KALIBO, Aklan–Nagapadayun pa sa makarun ro imbestigasyon it Bureau of Fire Protection ukon BFP-Kalibo agud nga matumod kung ano ro ginhalinan it nagtuhaw nga sunog sa may bahin it Oyotorong Street ibabaw, Brgy. Poblacion, Kalibo mga bandang 11:30 it agahon kahapon.
Suno kay FO1 Jan Ryl Magno, Fire and Arson investigator it BFP-Kalibo nga sa makarun hay ginatunguhaan pa it andang taeatapan nga mabo-oe ro pahayag it mga tag-iya it nasunog nga mix occupancies ukon magkahalong residential ag commercial building.
Samtang ginatantiyang nag-abot sa masobra 2 million ro inisyal nga danyos nga nailista sa nasambitan nga sunog, apang raya hay posible pang madugangan nakadepende sa igadeklarang danyos it mga nagapanag-iya it mga nasunog nga stalls.
Nasayuran nga nag-abot pa sa second alarm ro sunog kun sa siin nagbulig pa sa pagresponde ro pilang ka fire station sa ibang kabanwahanan partikular sa banwa it Numancia, Makato, Malinao, Banga ag New Washington kaibahan ro firefighter team it Kalibo International Airport.
Bandang 2:25 sa hapon kat gindeklara eun raya nga fire out.
Kapin sa daywang ka mga persona ro nailistang injured sa nagtuhaw nga sunog samtang sambilog man sa katapo it BFP personnel ro nakaangkon it pilang ka mga lastro sa katung-anan it pagapula sa sunog.
