KALIBO, Aklan — Naga-abot sa masobra sa 200 nga mga panimaeay ro naugdaw sa sunog nga nag-eontad sa Sitio Ambolong Bukid, Barangay Manocmanoc sa isla it Boracay, Huwebes it agahon.
Owa it nailistang namatay sa insidente, apang may pilang naninahan bangud sa pagmadali nga makaguwa sa andang natungdan nga mga panimaeay.
Suno kay Bureau of Fire Protection ukon BFP-Aklan Provincial Fire Marshall Supt. Nazrudyn Cablayan nga kaabuan sa nasunog nga baeay hay himo sa light materials.
Haeos tanan sigon nga firemen halin sa BFP Boracay Fire Substation, mga tawuhan it Boracay Tubi Systems Inc. ag mga miyembro it Boracay Fire Rescue and Ambulance Volunteers hay nagbueuligan sa pagtapna it kaeayo pasado alas-8:00 it agahon.
Apang, nabudlayan sigon ro mga bumbero nga makasaka sa lugar bangud sa mataas ag mapiot nga daean. Naging madasig man ro pagkalhit it kaeayo bangud sa mabaskog nga hangin ag dukot-dukot nga kabaeayan.
Gindeklara nga kontrolado ro sunog bandang alas-11:51 it agahon nga umabot sa general alarm.
Ginatantiya nga P20-milyon ro balor it gin-ugdaw nga propiyedad.
Ginasugid nga bangud sa napabay-an nga tinug-on ro kabangdanan it sunog nga gina-alegar nga matapos nga magdaba-daba hay gin-aywan raya it nagapanag-iya.
Apektado sa insidente ro kapin sa 52 nga pamilya nga presenteng sa evacuation center it Manocmanoc covered court.
