KALIBO, Aklan — Dapat nga ibalik it uman ro health declaration checklist nga kilaea sa tawag nga yellow card sa mga international flights nga nagasueod sa nasyon.
Sa interview it Bombo Radyo, ginpahayag ni Iloilo Rep. Janette Garin nga naging epektibo ro nasambitang tikang kat imaw pa ro sekretarya it Department of Health agud malikawan ro pagsueod it mga nakakamatay nga sakit kaparehas it SARS ag MERSCOV.
Makaron nga may paeag sigon it novel coronavirus, importante nga makaangkon it surveillance agud masayuran ro mga importanteng impormasyon it kada pasahero ag mga nakahalubilo kara sa eroplano.
Mag-eowas kara, insigida nga igapaidaeom sa quarantine ro mga makitaan it sintomas.
Kinahang-ean man sigon nga maging agresibo ro mga paeoparan sa nasyon kapin eon ro mga pasaherong halin sa mga lugar nga may nailistang kaso it coronavirus.
Ginlaygayan man kara ro publiko nga inde mag-panic, ipabilin ro proper hygiene ukon kalimpyuhan sa eawas, likawan ro pagpila sa kon siin-sin ag pabaskugon ro immune system.
Nasayuran nga sangka limang dag-on nga onga sa Cebu nga bumisita halin sa Wuhan, China ro ginabantayan makaron it DOH matapos magpositibo sa bag-ong coronavirus strain.
