Maabu eon nga estudyante ro nagakamatay sa hazing apang owa pa it eakot sa pagkamatay ro nabulok sa presuhan.
Sa pihak nga may Anti-Hazing Law ukon Republic Act 11053 nga nagahambae nga ro mga mapamatud-an nga eakot sa pagkamatay it neophyte hay pagapapanaugan it hasta nagakabuhi nga pagkapresu ukon reclusion perpetua, apang raya hay owa pa nagakatabu.
Owa pa it napinahan it life sentence.
Owa it ngipon ro laye.
Posibleng raya ro rason kon ham-an nga pauman-uman ro pag-recruit ag pag-hazing sa mga bag-ong miyembro.
Ro makangawa-ngawa pa, nagakatabu ro pag-recruit sa mga unibersidad.
Hilway nga nakakapag-recruit hasta nga magresulta sa madugo ag makangieidlis nga hazing.
Makibot eon man nga may una eon man nga namatay sa hazing.
Ro natabu nga hazing sa Adamson University student nga si John Matthew Salilig hay makabig nga pinaka-brutal sa tanan.
Miyembro it Tau Gamma Phi fraternity si Salilig nga nakaangkon it welcome rites ko Pebrero 18 sa sangka baeay sa Biñan City, Laguna.
Bangud sa mga grabeng bunae it paddle nga umabot sa 70, owa nasarangan ni Salilig ro kalisod.
Namatay imaw.
Ro pinakamasubo, gin-eubong imaw sa manabaw nga kutkot sa sangka bakanteng lote sa Imus, Cavite ko Pebrero 28.
Sangka miyembro it Tau Gamma ro nakonsensiya ag ginturo ro gin-eubngan kay Salilig.
Maabu nga miyembro it Tau Gamma ro naaresto ag pito sa mga raya hay ginkasuhan eon it Department of Justice.
Suno kay Senate President Juan Miguel Zubiri, pagasiguraduhon nana nga ro tanan nga mga eakot sa pagpatay kay Salilig hay mabulok sa presuhan.
Makaangkon eamang it kamatuoran ro ginhambae ni Zubiri kun ma-amyendahan ro Anti-Hazing Law ag ipatuman it madasig.
Kon indi magiging mabug-at ro penalidad sa mga maga obra it hazing, indi magapundo ro pagpa-antus ag pauman-uman eon lang nga may mamatay.
Maabung ginikanan ro maga-euha bangud nga gin-agaw it mga “uhaw sa dugo” nga miyembro it fraternity ro kabuhi it andang unga.
