KALIBO, Aklan—Matapos kanselahon ro Certificate of Land Ownership nga gintao sa 44 nga katutubong Ati sa Boracay, ginmando ni Department of Agrarian Reform Secretary Conrado Estrella III nga taw-an ro mga raya it eogta halin sa mga kaeogtaan nga ginapanag-iyahan it gobyerno.
Nakansela sigon ro Certificate of Land Ownership nga gintao sa Boracay Ati Tribal Association ko nagtaliwan nga Duterte administration matapos magdihon it protesta ro property developer it eogtang gintao sa mga katutubo.
Nagpakita ro presidente it property developer nga Anchor Land Holdings Incorporated nga si Digna Elizabeth Ventura it sertipikasyon halin sa Agricultural Land Management and Evaluation Division of the Bureau of Soils nga ro eogtang gintao sa mga katutubo hay bukon it angay ag bagay nga pang-agrikultura.
Bangud kara, ginpaboran it DAR Region 6 Office ro protesta ni Ventura.
Uwa man sigon nagpakita it ebidensiya ro mga katutubo nga maga-invalidate sa sertipikasyon nga gindihon ni Ventura.
Suno sa DAR, igatao sigon nanda ro tanan nga suporta ag bulig sa andang agrarian reform beneficiaries.
Sambilog eon kara ro pagtao it eogta nga pwedeng tamnan it mga na-displace nga katutubo bangud nga gusto ni Estrella nga bumalik sa pagpanguma ro mga katutubong Ati.
