Kumpirmado nga namatay eon si dating Department of Public Works and Highways (DPWH) Undersecretary Maria Catalina Cabral matapos nasapwan ro anang eawas sa Bued River sa Tuba, Benguet.
Gindeklara imaw nga patay alas-12:03, aga-aga it Biyernes, Disyembre 19.
Suno sa police reports, nag-request si Cabral nga aywan imaw sa Kennon Road samtang paagto sanda sa La Union, ginaboeobanta alas-3 it hapon it Huwebes. Nagbalik ro anang driver alas-5 it hapon apang indi eon raya makita.
Sa pagpati nga nagbalik si Cabral sa sangka hotel sa Baguio City kun sa siin imaw nagtinir, gin-agtunan raya it anang driver apang owa man idtu.
Uman raya nga nagbalik sa Kennon Road alas-7 it gabi-i apang owa man gihapon nakita.
Bangud kara, nagpangayo imaw it bulig sa kapulisan.
Alas-8 it gabi-i, nasapwan ro eawas ni Cabral nga owa eon it alintro ag owa naga-respond sa Bued River, 20 hasta 30 metros ro kadaeumon halin sa highway.
Kasunod kara, ginmandu it Office of the Ombudsman sa otoridad sa Baguio nga ikustodiya ag i-preserve ro cellphone ag iba nga gadgets it dating opisyal.
Si Cabral hay sambilog sa mabahoe nga personalidad nga gina-angot sa kontrobersyal nga flood control projects.
