KALIBO, Aklan — Nagpamalibad nga magtao i anumang pahayag ro dating provincial director it Technical Education and Skills Development Authority (TESDA)-Aklan sa guilty verdict nga gin papanaug it Sandiganbayan kaugnay sa gina alegar nga iregularidad nga pagtaeanan sa anang misis bilang competency assessor.
Gin sentensiyahan it First Division it Sandiganbayan si dating TESDA-Aklan provincial director Edwin Villanueva ag ro anang asawang si Nida Villanueva it an-um nga dag-un ag sang buean hasta it 10 dag-un nga pagka-presu bangud sa pag eabag sa Section 3 it Anti-Graft and Corrupt Practices Act.
Mag eowas kara, indi man pwedeng magbuyot it anumang posisyon sa gobyerno ro mag-asawa.
Ku Setyembre 5, 2014 hay nagpagowa ro korte it hold departure order kontra sa mag-asawa ag ku Setyembre 17, 2014 hay gin paaresto eon ro mga raya.
Apang, nakapiyansa sanda ku Hulyo 20, 2016 sa Regional Trial Court sa Iloilo City ag parehong nag-plead it guilty ku November 24, 2016 sa gin himong arraignment sa kaso.
Madumduman nga nag-ugat ro kaso kat maging competency assessor si Nida it Rayborn-Agzam Center (RACE), sangka private competency assessment firm ku Setyembre 2010.
Gin pasugtan ni Edwin ro kompaniya nga maging sangka training agencies it TESDA sa pihak nga kaibahan ro anang misis sa board of directors kara.
Naging in-house food and beverage assessor man ro anang asawa nga naga baton it honorarium nga P1,000 kada buean.
