SHOWIZ News —- Arestado ro dating aktor nga si John Wayne Sace bangud sa alegasyon nga may kahilabtanan imaw sa pagbaril-patay sa 43-anyos nga eaeaki sa Barangay Sagad, Pasig City, gabi-i it Lunes, Oktubre 28, 2024.
Nakilaea ro biktimang si Lynell Eugenio.
Ginasugid nga ginbaril it ap-at nga beses ni Sace si Eugenio gamit ro .45 kalibre nga baril sa nasambit nga lugar.
Base sa report, nadakpan ro dating aktor sa sangka hotel maeapit sa lugar ag ginkustodiya it Pasig City Police Headquarters.
Suno sa kapulisan nga may dati eon nga owa pagka-ilintindihan sanday Sace ag Eugenio.
Ko 2016, naeakot man si Sace sa sangka shooting incident kon sa siin may daywang owa nakilaea nga eaeaki ro nagpaeapit kana ag sa anang kaibahan nga si Erik Sabino.
Pareho sanda nga gindaea sa ospital apang si Sace eang ro nakaeowas ag namatay ro anang kaibahan.
Madumduman nga nakilaea si Sace bangud sa ginbidahan nga nagkaeain-eain nga mga pelikula ag teleserye, kapareho it Spirits, Guns and Roses, May Bukas pa, ag maabu nga iba pa.
Ginkilaea man imaw bilang Best Child Performer sa Metro Manila Film Festival ko 2002 bangud sa anang performance sa Dekada ’70.
