KALIBO, Aklan—Gintalakay sa ginpatigayun nga session it Sangguniang Bayan it Kalibo ro ginpadaea nga sueat ni dating Banga Mayor Antonio “Antong” Maming nga naga-request nga mapasugtan ro operasyon it online sabong sa banwa it Kalibo.
Ginpahayag ni Kalibo Sangguniang Bayan member Augusto Tolentino nga nakabaehag sa sueat ni Maming nga gina-representa kara ro Island Venture Gaming Corporation ag nagapangayo it endorsement.
Gintaw-an it punto ni Tolentino nga kinahang-ean anay kara nga mag-agi sa komitiba para sa maidid nga pagpangusisa.
Ginakinahang-ean man sigon kara nga mag-agi sa proseso ag nagakaigo nga konsultasyon agud matimbang it maayos antes nga madesisyonan.
May kaangtanan kara, gin-suhestyon man ni Pook Punong Barangay Ronald Marte nga istoryahan anay it mayad ro nasambit nga proposisyon.
Dapat sigon nga ma-imbitahan ro iba pang sector agud matalakay raya it maayos.
Suno pa kay Marte nga bukon it raya ro tama nga tyempo para magpangayo kanda it endorsement para sa no objection bangud raya hay may kaangtanan sa operasyon it online sabong nga makabig man nga sugae.
Maabo sigon ro nagakalisod makaron bangud sa kawad-an it trabaho tuga it pandemya.
