KALIBO, Aklan–Opisyal eon nga nagpahayag it pagwithdraw it anang kandidatura sa pagka-kongresista sa unang distrito it Aklan si dating Sangguniang Panlalawigan member Rodson Mayor.
Ro anunsyo hay pormal nga ginpaabot ni Mayor matapos ro ginpatigayun nga press conference kahapon.
Tuyo it pagwithdraw ni Mayor nga taw-an it daean ro kandidatura ni Batan Mayor Rodell Ramos bilang congressman sa May 9 elections.
Nag-apela man raya sa mga pumueoyong Aklanon nga suportrahan si Ramos kasunod it anang pag-endorso.
Ginklaro pa it dating board member nga bukon it problema sa anang ikaayong eawas ro rason it anang pag-withdraw.
Nagapati sigon imaw sa ikasarang ni Ramos bangud sa malimpyo kara nga political record.
May kaangtanan kara, ginkalipay man ni Atty. Rodson “Bobet” Mayor Jr. ro naging desisyon it anang ama nga magwithdraw ag eubusan nga magretiro sa politika.
Suno kana, mabuhay eon nanda raya nga ginakumbinsi nga indi eon magpadaeagan bangud indi eon nana masarangan ro paglibot para sa pagpangampanya tuga it anang health condition ag edad.
Samtang, ginkumpirma man it Commission on Elections (Comelec)-Aklan ro pagpasa it statement of withdraw ni Mayor.
Suno kay Atty. Reinier Leyson, Acting Provincial Supervisor it Comelec-Aklan, una eon sa andang posisyon ro mga dokumento nga personal nga gin-file it nasambit nga kandidato.
Sa makaron hay ginahueat eon lang nanda ro magiging sabat it law department it komisyon angot kara.
