Kalibo Aklan ————Nakataeana nga magabayad makarun nga adlaw it kapin sa P10,000 pesos nga piyansa ro akusado ag dating broadcaster nga si Carlo Asturias, sa legal nga edad, tubong Roxas City, Capiz apang temporaryong naga-istar sa Brgy. Ochando, New Washington.
Raya hay matapos nga maaresto ko adlaw it Sabado, Pebrero 12 , pamaagi sa gintingob nga pwersa it Criminal Investigation Detection Group (CIDG), Highway Patrol Group (HPG) ag New Washington PNP sa gahum it warrant of arrest sa kasong Cyber Libel ukon pag-eabag sa Republic Act 10171.
Sa eksklusibong pakikipag-angot it Bombo Radyo, ginsaysay ni Asturias nga engkasong makabayad sanda it piyansa makarun nga adlaw hay gilayon nga paga-ayuson it anang abugado ro iga-file karang motion for reconsideration agud uman nga makapangayo it tiyansa nga masabat ro nasambitan nga reklamo.
Dugang pa kara nga ro anang ginapangatubang nga kasong Cyber Libel hay ginpasaka it igmangod it ginbaril-patay nga si dating Sangguniang Bayan Member Jun Rondario it banwa it Malinao.
Base sa ginpasaka nga kaso ni Mrs. Fernando, igmanghod ni dating SB member Rondario ag nakabase sa Parañaque City, ro andang basehan sa pagfile it Cyber Libel case kontra kay Asturias hay bangud sa pagpakahuya kara sa andang igmanghod apisar nga raya hay namatay eun.
Madumduman nga ko Enero 26, 2020 kat ginbaril-patay si Rondario ag ko dato nga tiyempo hay nagatrabaho pa sa sangka radio station ro akusado nga si Asturias.
Pag-depensa man ni Asturias, matapos ro pagkamatay ni Rondario hay maabong mga Malinaonon ro nag-expose angot sa pagka-imbolbar ni Rondario sa pilang ka mga illegal logging ag illegal quarry sa nasambitan nga banwa.
Enero 12, 2021 kat nakabatun sigon imaw it sobpoena maghalin sa Prosecuetor’s Office sa Parañaque City may kaangtanan sa ginpasaka kana nga kasong Cyber Libel.
Gintaw-an man sigon imaw it 10 diyas agud nga sabton ro nasambitan nga akusasyon.
Apang bangud sa pandemya kun sa siin ginlimitahan ro paghueag it publiko hay napaseawan imaw nga makasabat sa akusasyon rason nga nagdesisyon ro piskalya nga ipadayun ro kaso.
Matapos nga maipasaka ro kaso sa korte hay nag-isyu man ro CIDG it warrant of arrest kontra kay Asturias nga sa makarun hay temporaryong nakakulong sa New Washington PNP para sa nagakaigo nga disposisyon.
