KALIBO, Aklan — Uman nga igaduso it lokal nga gobyerno it Kalibo ro dating ginproponer nga rerouting plan .
Raya ro ginpahayag ni Kalibo Sangguniang Bayan member Ronald Marte.
Suno kana nga maabu nga mga tricycle drivers , operators ag commuters ro nagkontra dati sa Municipal Transport and Traffic Code ko 2020.
Madumduman nga sa nasambit nga patakaran, ginapasugtan eamang ro mga tricycle nga magbiyahe sa guwa it andang ruta kon nagadaea it mga may pasyente sa mga ospital ukon klinika kamana man kon may mga emergency ag kon nagahatud it mga kapamilya sa eskwelahan ag andang mga gina-obrahan.
Nagapanguna nga tuyo kara nga maayos ro daeagan it trapiko kun sa siin ginapasugtan eamang nga makabiyahe sa sueod it poblacion ro mga tricycle nga may franchise nga barangay poblacion Kalibo.
Dugang pa ni SB marte nga masyado eon nga congested ro banwa it Kalibo bangud nga mag-eowas sa mga pribado nga saeakyan hay masobra sa 3,000 ro mga nagabiyahe nga tricycle nga may ruta sa 16 nga barangay sa Kalibo.
Agud nga matan-aw it uman ro problema sa rerouting plan, magapatigayon sigon kara it dry run.
Anuman ro maging reaksyon it tricycle drivers ag commuters, paga-estudyuhan it natungdan agud nga makabaeay it nagakabagay nga traffic plan.
Sa pihak nga parte, gindugang pa it opisyal nga ginatun-an man nanda makaron ro posibleng mga ruta nga paga-agyan it mga tricycle engkaso nga eubusan eon nga igabawae ro pag-agi it mga raya sa mga limang natumod nga national highways sa Kalibo.
