KALIBO, Aklan — Nagpahayag it kahauman si dating Kalibo Mayor Engr. Emerson Lachica nga maga-ober-da-bakod sa local political party nga Tibyog-Akean .
Suno kana nga pilang buean antes ro barangay elections hay naimbitahan imaw nanday dating Aklan Governor Joeben Miraflores para sa sangka pueong, apang owa pa it pagpanumpa nga natabu bangud nga owa pa imaw kato it pinal nga desisyon.
Owa suno kana it anuman nga ginpromisa kana nga political position ro partido ag owa man imaw it ginpangayo para sa maabot nga midterm elections sa 2025 sa oras nga magsueod sa nasambit nga partido.
Ro sigurado eamang suno kana hay nagustuhan nana ro tinutuyo it partido agud nga maging tayuyon ro pag-umwad it probinsiya .
Ginpahayag dugang kara nga may pilang barangay officials ro nagpasiguro kana it suporta.
Sa pihak nga parte, gindugang pa ni Engr. Lachica nga nagapabilin nga maayos ro andang relasyon it anang magueang nga si dating Kalibo Mayor Willliam Lachica .
Nagakililita man sigon sanda kada may pagtililipon ro andang pamilya , apang owa nanda gina-istoryahan ro angot sa pulitika .
Pareho sigon sanda nga kwalipikado nga magpa-ilihir bilang alkalde it banwa bangud sa andang experiensiya.
Nasayuran nga nauna eon nga napabalita nga ginpatawag man ro anang magueang nga si William ni Aklan 1st district Congressman Ted Haresco nga nagapatimaan eamang nga nagahugum eon it pulitika sa probinsiya .
