KALIBO, Aklan—Nagdihon eon it Certificate of Candidcy (CoC) si dating Kalibo mayor William Lachica para sa uman nga paghana nga mabo-oe ro pwesto sa pagka-gobernador sa idaeum it Partido Federal ng Pilipinas ni presidential aspirant Bong-bong Marcos.
Kaibahan nana nga nag-file it COC ro anang running mate nga si Sangguniang Panlalawigan member Atty. Immanuel ‘Nolly’ sodusta ag Batan mayor Rodell Ramos nga magapadaeagan bilang kongresista sa unang distrito it Aklan.
Suno kay Lachica nga maabu ro andang handum ag plano ni Ramos engkaso nga swertehon sa eleksyon sa masunod nga dag-on para sa mas pang ika-umwad it probinsiya.
Sambilog sa andang ginaduso ni Ramos hay makaangkon it pag-asenso sa banwa it New Washington ag Batan nga mabuhay nga tiempo nga owa sigon nataw-an it atensyon it gobyerno.
Samtang, gindugang pa ni Lachica nga gina-respeto nana ro desisyon it kaalyadong si Sangguniang Panlalawigan member Atty. Harry Sucgang nga magpadaeagan man bilang 1st district congressman matapos nga ro ginpili it andang grupo hay si Ramos.
Ro importante sigon makaron eabi pa ag nagapangatubang ro nasyon sa pandemya nga daea it covid 19 hay ro pagbueuligan it kada isaea.
Sa pihak nga parte, ginpahayag ni Batan mayor Rodell Ramos nga ro naging desisyon nana nga pag-ober-da-bakod sa grupo ni lachica ag magpadaeagan bilang kongresista it unang distrito hay ginpag-isipan nana it husto.
Ro kada isaea suno kana hay may kinamatarung magpailihir , kun sa siin ro nagapangunang tuyo kara hay ro magserbisyo sa publiko.
Nag-apela man imaw nga suportahan ro anang kandidatura para sa ginahandum nga pagbag-o.
Sa pihak nga parte, kaibahan sa nag-file it COC sa pagka-SP member sa 1st district si Atty. Axel Gonzales pinaagi sa anang representante nga si Nelson Nam-ay ag manghud ni Police Provincial Director Ramir Perlas nga si Roiden Perlas sa 2nd district bilang independent candidate.
