Arestado ro dating kapitan it Brgy. Capatag, Malinao nga si Antonio Fernando, 54-anyos, matapos nga mabue-an it bukon it lisensyadong baril sa ginserbe nga search warrant it CIDG-Aklan sa anang baeay sa Brgy. Bulabod Malinao kahapon, Pebrero 26.
Suno kay PSMS. Rene Tangkoy, OIC-PNCO, CIDG AKLAN- PFU, ro nasambit nga search warrant hay tuga it reklamo nga pagpanghadlok kun mahilong it nasambitan nga dating kapitan.
Narekober ro sangka 9mm pistol nga may kaibahan nga magazine apang uwa it sueod nga bala.
Dugang pa ni PSMS. Tangkoy, ginhaboy pa it nasmabit nga kapitan ro baril sa likod it anang baeay kat magpakilaea ro mga kapulisan.
Sa makaron, posible nga mag-atubang ro dating kapitan sa kasong pageabag sa RA. 10591 ukon ro Comprehensive Firearms and Ammunition Regulations Act.
Padumdom man ni PSMS. Tangkoy nga kun may baril nga bukon it lisensyado hay mas mayad nga iturn-over eon lang sa mga kapulisan.
