KALIBO, Aklan–Mainit nga nagbaeayluhan it akusasyon ro dating mag-live-in partner sa programang Bombohanay Bigtime angot sa kustodiya it andang tatlong menor de edad nga unga.
Ginhangkat ni joseph balbalosa ro dating partner nga si Marilyn Nicolas nga mag-agto sa Bacacay, Albay kon gusto kara nga mabawi ro andang unga.
Gin-akusahan pa kara si Marilyn nga raya ro unang nagtalikod sa anang pamilya.
Matapos sigon nana nga madaea pauli sa bicol ro andang mga unga ko 2016 halin sa aklan hay napas-eawan ro anang asawa nga maka-apas kanda, kun sa siin ko ulihi natukiban nana nga nabdos raya sa anang bag-ong karelasyon.
Samtang, gin-insister ni Marilyn nga puro kapurilan ro ginpahayag it dating karelasyon nga si Joseph.
Ro importante sigon kana makaron hay mabawi ro anang mga unga.
Nasayuran nga ro custody battle it dating magpartner sa andang mga unga hay nauna eon nga ginpatung-an it municipal social welfare and development office it Bacacay, Albay.
Apang ginasugid nga bangud sa pag-brain wash sa mga unga hay nagpamalibad raya nga magsunod sa andang ina ag mas gusto nga magpabilin sa poder it andang ama.
Sa pihak kara, gin-insister ni Atty. Axel Gonzales nga syento porsiyento nga may kinamatarung ro sangka ina nga magkustodiya sa anang mga unga eabi pa kon sanda hay illegitimate.
Suno kana nga sandig sa Article 176 it Family Code, ro kustodiya it unga nga illegitimate ukon unga it mga bukon it kasae hay ginatau sa anang nanay.
Ginarekomenda pa kara nga kasuhan ni Marilyn ro dating karelasyon it kidnapping ukon pag-eabag sa republic act 9262 ukon Anti-Violence Against Women and Their Children Act agud nga mapilitan raya nga magsipot sa aklan ag ibalik ro andang mga unga.
