Dead on the spot ro sangka dating opisyal it Brgy. Bagacay matapos nga ginbaril-patay it ginatumod nga suspek nga riding in tandem bandang alas-6:48 it gabie maeapit sa sementeryo it Brgy. Poblacion, Ibajay.
Ginkilaea ni Punong Brgy. Remar Bautista it Poblacion ro biktima nga dating kapitan nga si Mhelvin Cabales, sa legal nga edad ag residente it Brgy. Bagacay.
Sa inisyal nga imbestigasyon, halin sa Brgy. Ondoy si Cabales nagtan-aw it basketball bangud nga may hampang ro anang ongang eaeaki.
Sa pag-uli sigon kara sakay it motorsiklo angkas ro anang asawa ag onga hay medyo mahayag-hayag pa ro daean rason nga posibleng uwa pa nakabuhat ro mga suspek.
Pag-abot suno kana sa may sementeryo hay dikara eon binaril ro dating kapitan sa ueo ag sentro gid ro pagkaigo nga gintunaan sa anang hinali nga kamatayon.
Apang uwa it tama it baril ro anang mag-ina rason nga ginapatihan imaw eamang ro target it mga suspek.
Samtang, gindumdum man ni kapitan Bautista ro pag-amiguhan nanda ni Cabales matapos nga haeos waeong dag-on sanda nga nag-iba sa liga ng mga barangay.
Uwa suno kana imaw it nabatian nga may nakaalitan ukon may naakig sa dating opisyal it barangay.
Mabuot sigon nga tawo si Cabales ag naga alaga eamang raya it kasapatan sa andang kamana man kon amat hay sa bueangan imaw makit-an.
Bukon man sigon it paeainom it aeak si Cabales ag uwa imaw it matumod nga motibo sa pagbaril-patay kana.
May kaangtanan kara, nagpanawagan si kapitan Bautista sa mga pumueoyo it banwa it Ibajay nga kon may kasayuran sa krimen hay inde eon maghipos ag insigida nga magreport sa taeatapan it pulisya ukon mismo sa anang taeatapan para mataw-an it hustisya ro kamatayon ni Cabales.
Ro insidente hay padayon pang ginaimbestigahan it Ibajay Municipal Police Station.
