Gadaeagan it uman sa eleksyon si dating Pangueong Rodrigo “Digong” Duterte apang bukon it senador kundi mayor it Davao City, sa dati nana nga puwesto bago naging 16th president it Pilipinas ko 2016.
Sa sangka press conference sa Davao City ko Sabado it gabie, ginkutana anay kara nana ro media kung pabor ro publiko nga uman imaw magaserbi bilang alkalde it syudad .
Ginhambae man it media nga pabor ro mga Davaoeño sa anang pagbalik.
Pagahimuon sigon kara nana nga running mate ro unga nana nga si Davao City Mayor Sebastian “Baste” Duterte.
Nagpaathag man si dating Pangueong Duterte kung ham-an indi eon raya magpangampanya sa national level.
Raya hay bangod sa naga kaedad eon imaw ag sa sitwasyon it ana nga kaeawasan.
Uman man nga nagpaandam si Duterte sa mga drug dealer nga lumayas sa Davao kung imaw hay maging mayor it uman sa syudad sa 2025.
Ku nakataliwan nga Biyernes, gin-engganyo ni Partido Demokratiko Pilipino (PDP) president ag Sen. Robin Padilla si dating Pangueong Duterte nga magdaeagan sa senador o maskin sin-o sa mga unga kara.
