NATIONAL News — Ginhinyo ni dating Presidente Rodrigo Duterte sa anang mga supporters nga indi eon magpasilabot sa anang kaso sa International Criminal Court (ICC), suno kay Vice President Sara Duterte.
Sa sangka pahayag, ginpabutyag ni VP Sara nga raya ro mensahe it anang ama sa anang abogado bangud nga owa sanda nagkita ko Marso 28.
Suno kay VP Sara, ginpahayag it dating presidente nga dapat atubangon it anang legal team ag korte ro proceedings it kaso nga owa it masyadong impluwensya halin sa guwa. Ginpahayag man ni FPRRD nga indi pag-istoryahan ro kaso sa publiko, eabi eon ro angot sa mga tagreklamo sa ICC.
Sa baylo, gin-engganyo ni FPRRD ro anang mga suporter nga suportahan ro mga kandidato it PDP-Laban sa paeaabuton nga eleksyon sa Mayo.
Samtang, ginpahayag ni VP Sara nga may gintaeana nga rally ro anang ama para sa mga kandidato antes raya nga gindakop ag nagsurender sa ICC ko Marso 11, apang owa eon raya nakapangampanya.
Sa makaron hay nagapabilin sa kustodiya it ICC si Duterte bangud ro kaso nga krimen kontra sa katawhan nga may kaangtanan sa pageabag sa tawhanong kinamatarong sa idaeum it anang administrasyon.
