KALIBO, Aklan—Nagapati si Atty. Harry Sucgang, dating provincial board member ag political analyst sa Aklan nga pwedeng mataw-an it temporaryong kahilwayan si dating pangueong Rodrigo Duterte bangud sa humanitarian reason.
Raya hay ro pagtau it konsiderasyon sa anang edad, ikamayad nga eawas ag iba pa.
Apang sigurado suno kana nga pagabaeagan raya it pamilya it mga biktima it extra judicial killings.
Kasunod raya it pahayag ni Atty. Nicholas Kaufman, abogado ni Duterte nga nagapahaum eon sanda sa igadihon nga request sa International Criminal Court ukon ICC para sa interim release it anang kliyente antes ro anang masunod nga hearing sa buean it Setyembre .
Dugang pa ni Atty. Sucgang nga dapat nga sundon ag i-respeto ro proseso it korte sa The Hague angot sa kaso nga anang ginapangatubang ag likawan nga pasilabtan raya it isyu sa politika.
Kon analisahon suno kana ro sitwasyon, may mayad nga intensyon ro dating pangueo sa anang ginlunsar nga kampanya kontra sa iligal nga droga, apang may ginapatuman nga laye nga owa nana ginsunod rason nga nakakomiter imaw it saea.
Madumduman nga si Duterte hay presenteng nakakulong sa Scheveningen penitentiary angot sa anang kasong crimes against humanity.
