KALIBO, Aklan — Balik kulungan ro sangka dating preso matapos nga maaresto sa ginpatigayon nga buy-bust operation sa Brgy. Estancia, Kalibo, Huwebes it hapon.
Dati eon nga nakulong ro 41-anyos nga suspek nga si Efren Villanueva, alyas Alas, residente it Brgy. Andagao, Kalibo bangud sa kasong may kahilabtanan man sa illegal nga droga.
Pilang buean pa eamang sigon raya nga nakahilway pinaagi sa plea bargaining agreement kat uman nga maaresto matapos nga makabakae it droga ro mga operatiba.
Nabo-oe sa suspek ro sangka sachet it ginadudahan nga shabu kabaylo it buy-bust money nga P10,000.
Suno kay P/Major Frenzy Andrade, head it Provincial Drug Enforcement Unit (PDEU) nga si Alas ro ginaturo it mga naunang naarestong drug pusher nga naga-supply it droga sa banwa it Kalibo.
Kasong pag-eabag sa Republic Act 9165 ukon Comprehensive Dangerous Drugs Act of 2002 ro anang ginapangatubang.
