KALIBO, Aklan — Balik-presuhan ro sangka eaeaki matapos nga madakpan sa ginpatigayon nga buy-bust sa Brgy. Estancia, Kalibo.
Nakilaea ro suspek nga si Jilson Lopez, 37, sangka driver, tumandok it Bacolod City, apang presenteng naga-istar sa Brgy. Pook, Kalibo.
Nabak-ean it nagpakuno-kuno nga buyer si Lopez it sangka mabahoe nga sachet it ginadudahan nga shabu sa balor nga P8,000.
Base sa imbestigasyon, ko dag-on 2014 hay nakulong eon si Lopez bangud gihapon sa droga ag nakaguwa ko Agosto 2018 pinaagi sa plea bargaining agreement.
Sa interview it Bombo Radyo, hugut nga ginpamalibaran it suspek nga ana ro narekober nga droga.
Suno kana nga gintawagan imaw ni Rex Dalida nga mag-agto sa lugar, apang pag-abot sa lugar hay nakibot eamang imaw kat gindumog it mga operatiba ag ginpusasan.
Nakataeang kasuhan ro suspek it pag-eabag sa Comprehensive Dangerous Drugs Act of 2002.
