KALIBO, Aklan — Nagapati si Atty. Harry Sucgang, sangka political analysts nga imposible eon nga maibalik pa sa presuhan si dating senador ag congresswoman-elect Leila de Lima.
Raya hay kasunod it mandu it Office of the Solicitor General sa Court of Appeals nga uman nga buksan ro sambilog sa anang drug cases nga nauna eon nga nabasura it manaba nga korte.
Suno kay Atty. Sucgang nga owa eon sa gahum ag nakakulong eon sa The Hague Netherlands ro anang mortal nga kaaway nga si dating Pangueong Rodrigo Duterte.
Pa-waether-weather sigon ro kalakaran it hustisya sa Pilipinas rason nga nakadepende sa mga connections sa gobyerno ro mangin daeagan it ginapangatubang nga kaso.
Madumduman nga nauna eon nga ginkwestiyon it SolGen ro pagka-acquit it sambilog sa mga drug cases kontra kay de Lima nga makaron hay gin-reverse it Court of Appeals.
Base sa “certiorari” petition nga gindihon ni Solicitor General Menardo Guevarra nga ginpasugtan man it Court of Appeals 8th Division, uman nga nakapending ro acquittal ni De Lima sa nasambit nga drug case.
Ginpaathag ni Atty. Sucgang nga ro certiorari hay sangka klase it petisyon nga ginagamit it mataas nga korte agud nga kuwestiyunon ro desisyon it manabang korte kun sa siin raya ro gingamit ni SolGen Guevarra kontra sa naging desisyon it Muntinlupa City Regional Trial Court.
Ro acquittal ni De Lima sa sangka drug case ko 2023 ro ginahana nga eagson it Solicitor General kun sa siin naabswelto kara ro anang sambilog nga kaso matapos nga bawion ni dating Bureau of Corrections chief Rafael Ragos ro anang mga pahayag kontra sa gin-akusahan nga si De Lima.
Imposible man sigon nga ipaidaeum raya sa re-trial bangud sa ginatawag nga double jeopardy.
