Magaatubang sa anang unang pagbista sa kasong insurrection ukon pagsoe-soe sa pag-aklas ro dating Presidente it South Korea nga si Yoon Suk Yeol makaron nga adlaw it Lunes angot sa anang napas-eawang paghana nga magdeklara it martial law ko Disyembre 2024.
Madumduman nga ko Disyembre 3, ginmando ni Yoon ro pagsuspinde it mga aktibidad pampulitika ag pagpatuman it media censorship nga nagbuhay eamang it an-om nga oras bago ginbasura it oposisyon sa National Assembly.
Bangud kara, gilayon imaw nga na-impeach ag ko Abril 4, daeayon nga pinatalsik it Constitutional Court sa puwesto si Yoon.
Naaresto man si Yoon ko Enero matapos nagpamalibad nga magsurender sa mga awtoridad sa sueod it pilang dominggo.
Imaw man ro kauna-unahang presidente it South Korea nga naaresto samtang una sa puwesto.
Samtang, ginpahilway imaw matapos ro 52 diyas, matapos kwestyunon it korte ro legalidad it anang pagkakulong.
