KALIBO, Aklan—Imbes nga gobernador, magapadaeagan eon lang bilang representante it unang distrito it Aklan si dating sangguniang panlalawigan member Rodson Mayor sa 2022 national and local elections sa anang uman nga pagbalik sa pulitika.
Raya ro ginkumpirma ni Mayor sa interview it Bombo Radyo Kalibo.
Suno kana nga nagbag-o ro anang isip matapos nga mataeupangdan nga owa it inobrahan si Aklan 1st district congressman Carlito Marquez sa haeos patapos eon kara nga ikaywang termino sa kongreso eabi eon ro improvement sa mga daeanon nga sakop it eastern side it probinsiya, pagduso sa cityhood it Kalibo ag pagpatindog it city hospital nga kompleto sa pasilidad.
Ginpabugae pa ni mayor nga haum eon imaw sa uman nga pagsabak sa pulitika, kun sa siin engkaso nga swertehon hay may mga nakalinyada eon imaw nga plano.
Maka-ibahan sigon nana sa annag line-up sanday dating Kalibo mayor William Lachica bilang gobernador ag board member Atty. Nolly Sodusta bilang bise gobernador.
Posible nga makaengkwentru ni Mayor si congressman Marquez sa maabot nga eleksyon.
