KALIBO, Aklan—Maskin sin-o pa ro anang maka-engkwentru, nagpanindugan si dating provincial board member Rodson Mayor nga indi imaw maga-atras ag padayun ro anang away sa ambisyon nga maging gobernador it probinsiya it Aklan sa nagahilapit nga 2022 eleksyon.
Raya hay kasunod it napabalita nga magapa-ilihir man sa nasambit nga posisyon ro kaalyadong si dating Kalibo mayor William Lachica nga ginaduso kunta kara nga magpadaeagan bilang kongresista it uno distrito it probinsiya nga posibleng makabangga ni congressman Carlito Marquez.
Engkaso nga matabu, magiging three-corner–fight ro hinampang sa pagka-gobernador sa tunga nanda it matunog man nga kandidato it tibyog-akean nga si Ibajay mayor Jo-en Miraflores.
Maskin nga owa pa it pinal nga desisyon, indi sigon nana pag-hawiran si Lachica sa anang plano bangud nga gina-respeto nana ro desisyon kara.
Ginatugyan sigon nana sa mga botante ro pagdesisyon.
Gindugang pa kara nga indi nana paga-abandonahon ro ginpakitang suporta kana it mga tawo umpisa nga sumabak sa pulitika.
Mag-eowas kay Lachica, suportado man sigon nana si dating Banga mayor Antong Maming nga uman nga magasabak sa nasambit nga posisyon ka-tandem ro anang asawa nga si incumbent Banga mayor Erlinda Maming.
Sa makaron hay owa pa masyadong nagapabatyag ro mga posibleng kandidato sa publiko sa maabot nga eleksyon.
