KALIBO, Aklan–Pabor si dating Sangguniang Panlalawigan member Atty. Harry Sucgang nga bag-uhon ro konstitusyon apang indi eon ibalik ro dating sistema sa idaeum it 1935 constitution.
Suno kana nga maabu ro maapektuhan kara eabi eon ro kinamatarung it mga pumueuyu.
Ginpahayag ni Atty. Sucgang nga nagasueong nga konstitusyon ro kinahangean it pilipinas ag bukon it paatras.
Dapat suno kana nga amyendahan ro bag-ong konstitusyon, dugangan ro mga manami nga provisions ag paeson eon ro mga bulok.
Gusto man ni Atty. Sucgang nga duea-on ro partylists system bangud nga masyado raya nga naabuso.
Raya hay kasunod it pahayag ni Chief Presidential Legal Counsel Juan Ponce Enrile nga mas mayad nga ibalik sa 1935 ro Konstitusyon it nasyon kun sa siin para kana mas simple ag mas eowas ro nasambit nga saligang batas.
Ginaduso ni Enrile nga ibalik ro nasyon sa two party political system kapareho ko pagkatapos it World War II.
Nagapati man si Atty. Sucgang nga tiempo eon agud nga magretiro bilang public servant si Enrile sa edad nga 94.
Samtang, ginbatikos ni Atty. Sucgang ro rekomendasyon ni Enrile nga obrahon nga 48 ro senador halin sa 24 bangud sa naga-inabu eon nga populasyon it nasyon.
Suno kana nga mas mayad nga ro kaban it nasyon hay itaeana sa mga mapuslanon nga mga bagay ag bukon it ipasweldo sa mga pulitiko nga korap nga naging rason it mas pang pagkalisod it mga pumueuyu.
Sa pihak nga parte, mabahoe ro pagpati it abogado nga maamyendahan ro konstitusyon sa idaeum it pagdumaea ni pangueong Ferdinand Marcos Sr. bangud sa manami nga intensyon kara eabi eon sa patag it ekonomiya.
Apang imposible suno kana nga ipaidaeum sa federal form of government ro nasyon.
