NEWS Analysis–Ginaduso makaron sa Kongreso ro pagbalik sa dating school calendar agud nga indi ma-expose sa grabeng init kun Abril ag Mayo ro mga estudyante.
Sa bag-ong school opening, naga-umpisa raya it Agosto ag nagatapos it Mayo.
Naga antus ro mga estudyante sa tiempo it summer bangud nga medyu oven ro classroom.
Maskin may electric fan sa classroom, indi masarangan ro grabeng init.
Ro nagaguwa nga hangin sa electric fan hay mainit man.
Bukon eamang ro mga estudyante ro nabudlayan kundi pati mga manugturo.
Magamasakit ro mga manugturo ag estudyante sa grabeng init nga naexperiensiyahan.
Mabahoe nga isyu kon may mga estudyante nga nagamasakit.
Ro pagbalik sa June opening it klase hay ginproponer ni ACT Teachers party-list Representative France Castro.
Sa idaeum it anang proposisyon nga House Bill 8550, igabalik sa Hunyo hasta Marso ro sueod it klase.
Suno kay Castro, ro School Year 2024-2025 hay maga-umpisa sa unang Lunes it Hunyo.
Ginpahayag ni Castro, owa nagakabagay eabi eon sa ikamayad nga eawas it mga manugturo ag estudyante ro sueod it klase kada Agosto hasta Mayo.
Dapat eon nga tun-an ro proposisyon nga ibalik sa Hunyo ro sueod it klase.
Makaeoeo-oy man ro mga estudyante ag manugturo kon nakababad sa init sa classroom.
Sa baylo nga makapag-concentrate ro mga estudyante sa andang leksyon, bukon sanda it komportable bangud sa sobrang init.
Owa man it maitau nga electric fan ro Department of Education (DepEd).
Kon may una man, indi man masarangan nga paeamigon ro nagabagang classroom.
Ibalik eon lang sa dati ro school opening para sa kamaeayran it mga estudyante ag mga manugturo man.
