KALIBO, Aklan—Kumpiyansa si Bombo International Correspondernt Juliana Olmetti it Chicago, USA nga makulong si dating US president Donald Trump bangud sa mga kaso nga anang ginapangatubang.
Raya hay matapos nga gin-umpisahan eon ro mabuhay nga ginahueat nga hush-money criminal trial para kay Trump sa New York.
Suno kay Olmetti nga makasaysayan ro nasambit nga trial bangud nga raya ro kauna-unahan nga tiempo nga ini sangka presidente it Amerika, dati man ukon nagapungko pa sa posisyon ro napasakaan it kasong kriminal.
Ginpaathag kara nga sa nasambit nga kaso, ginaturo si Trump nga nag-cover up sa $130,000 ukon P7.4-million nga hush-money payment sa porn star nga si Stormy Daniels antes ro 2016 election kun sa siin na-ilihir imaw sa pwesto.
Gina-alegar ni Daniels nga naghieawas sanda ni Trump ko 2006 apang ginbayaran imaw it abogado it dating presidente agud maghipos.
Gin-akusahan man si Trump sa pagpeke it anang business records pinaagi sa paghambae nga ro reimbursement money hay anang gintau sa anang abogado para sa legal fees.
Nasayuran nga 34 nga counts it fraud ro ginapangatubang ni Trump apang ginpamalinbaran nana tanan pati eon ro affair kay Daniels.
Ro maximum penalty kun mapamatud-an nga guilty hay ro ap-at nga dag-on nga pagkapreso.
Dugang pa ni Olmetti nga posibleng magbuhay it daywang domingo ro trial.
Apang gintawag raya ni Trump nga “scam” ag “politically motivated”.
