KALIBO, Aklan—Arestado ro daywang ka mga security guard sa pag-eabag sa gun ban nga ginapatuman it Commission on Elections ukon Comelec sandig sa paaeabuton nga Barangay and Sangguniang Kabataan Elections sa Tabon Port, Caticlan, Malay.
Ro mga suspects hay residente it banwa it Ibajay ag Poblacion, Malay.
Ro daywa hay nagapanikangon sa Tabon Port bitbit ro andang mga armas samtang naga-escort sa cash maghalin sa sangka banko sa isla it Boracay.
Suno kay PLt.Col. Dainis O Amuguis, OIC of Malay Municipal Police Station, ginhambaean ro daywa nga ipresentar it mga raya ro andang Certificate of Authority maghalin sa Comelec angot sa pagdaea it andang armas apang napas-eawan sanda nga makapakita it nasambit nga dokumento.
Nakumpiska sa mga raya ro daywang ka shotguns ag 9mm pistol nga loaded it mga bala.
Ro daywa hay parehong private security personnel it private security investigation agency nga nakabase sa Mindanao kon sa siin insigida sanda nga gindaea sa taetaapan it pulisya para sa nagakaigong disposisyon.
Nauna eon nga ginadumilian it Comelec ro pagdaea ag pagtransport it firearms, explosives ag iba pang deadly weapons sa kasagsagan it Election Period maghalin it Agosto 28 hasta it Nobyembre 29 mag-eowas eon lang kon may igapakita nga approved Certificate of Authority para kanda.
