KALIBO, Aklan—Parehong gindaea sa Aklan Provincial Hospital ro daywa ka mga persona matapos nga sumunggab sa poste it iwag ro andang ginasakyang motorsiklo sa kahabaon it D’Maagma Street, Brgy. Poblacion, Kalibo, Aklan.
Nakaangkon it lastro sa ueo ro driver nga si Mark Gonzales, 47-anyos, residente it Brgy. Tigayon, Kalibo samtang lastro sa siki ro naagum it backrider kara nga si Maria Divina Irabet, 31-anyos, tumandok it Brgy. Cortez, Balete apang presenteng naga-istar sa barangay Tigayon.
Base sa inisyal nga imbestigasyon it Kalibo PNP, parehong una sa idaoem it impluwensya it aeak ro mga biktima matapos nga maghalin sa sangka ilimnan sa banwa it Kalibo.
Sa andang pagbyahe pauli partikular pag-abot sa nasambitang lugar, gina-alegar nga eumapaw ro andang motorsiklo sa gutter it karsada rason nga sumunggab raya poste nga gintunaan it andang pagkadisgrasya.
