KALIBO, Aklan—Nagapadayun pa ro ginapatigayun nga rescue operation it local authority kasunod it nag-eontad nga mudslide sa siyudad it Atami sa Shizuoka, Japan.
Suno kay Bombo International Correspondent Johnny Sato Gallos it Fuji city, Japan nga naga-abot sa 2,800 ka mga panimaeay ro nadaeasa it mudslide kun siin daywang katawo eon ro nailistang namatay samtang 20 ro nagapabilin nga missing.
Mag-eowas kara, maabo man nga pumueoyo ro ginbakwit sa mga evacuation center.
Aminado man si Gallos nga medyo mabudlay sa pagpatigayun it rescue operation bangud sigidas gihapon ro pagbubu it mabaskog nga uean.
Ginasugid nga haeos tatlong adlaw eon nga owa it pundo ro pagbubu it uean rason para maghumok ro eugta sa mga kabukiran ag magresulta it madamoe nga mudslide ag tubi-baha.
Raya sigon ro unang kahigayunan nga may natabo nga mudslide sa Shizuoka Prefecture.
Angot kara, madasig man sigon ro pag-aksyon it gobyerno eabi eon sa pagpaabot it bulig sa mga apektadong residente.
Owa man ginaduea ni Gallos ro posibilidad nga madugangan pa ro nailistang missing bangud owa pa natapos ro rescue operation it mga otoridad.
