KALIBO, Aklan—Dead on arrival ro magmanghod samtang tatlo ro ninahan sa nag-eontad nga aksidente sa Brgy. Tambak, New Washington.
Ginkilaea ro mga namatay nga sanday Jorlan Tecson, 28-anyos ag Genard Tecson, 22-anyos ag mga residente it Brgy. New Buswang, Kalibo.
Samtang, ninahan man sanday John Carlos Villanueva, 29-anyos it Brgy. Bubog, Numancia, backrider nana nga si Ian Paderes it Brgy. Tinigaw, Kalibo kamana man si Elaijo Maravilla, 47-anyos nga driver it tricycle sakay ro anang mag-ina nga sanday Ava Joy Maravilla, 45-anyos onga nanda nga sanday Claire Andria, 18-anyos ag sangka menor de edad nga si Gian Maravilla.
Samtang, nag-eain man ro pagginhawa it driver it saeakyan nga si Jose Marie Simon Mayor kasunod it pagkaimbolbar kara sa aksidente.
Base sa inisyal nga imbestigasyon it New Washington Municipal Police Station, halin sigon sa banwa it New Washington ro magmanghod sakay it motorsiklo kon sa siin madasig ro andang pagpadaeagan ag pag-abot sa nasambit nga lugar hay inagaw kara ro linya it karsada it nagasub-eang nga kaparehong behikulo nga ginamaneho ni Villanueva angkas si Paderes kon sa siin dikara eon natabo ro aksidente.
Angot kara, nadaeahig ro nagasunod nga tricycle it pamilya Maravilla kamana man ro saeakyan ni Mayor.
Sa pagkarambola it ap-at ka mga behikulo hay gintunaan it hinali nga kamatayon it magmanghod ag pag-angkon it lastro it tatlong iba pang indibidwal.
Ro aksidente hay padayon pang ginaimbestigahan it New Washington PNP para sa nagakaigong disposisyon.
