Magapatigayon it daywang adlaw nga Aklan career expo and job fair ro Public Employment Service Office ukon PESO umpisa makaron nga adlaw it Miyerkules, Abril 19 ag magatapos hin-aga nga adlaw it Huwebes, Abril 20 halin alas-8:00 it agahon hasta it alas-4:00 it hapon sa ABL Sports Complex sa Capitol Site, Estancia, Kalibo.
Suno kay Sharon Mae Julian it PESO Aklan nga raya hay kaparte sa nagahilapit nga selebrasyon it Aklan Day sa Abril 25.
Angot kara, kapin sa 30 ro kumpirmadong local establishment nga magapasakop sa nasambit nga aktibidad nga ginapanan-aw nga magata-o it trabaho sa 2,700 nga job seekers.
May mga local job vacancies nga ginatanyag ro mga establisyimento nga makit-an eamang sa sueod it nasyon.
Kinahang-ean it mga raya ro mga skilled workers, hotel workers ag maabong iba.
Samtang sa pihak nga parte, ginpahayag mat-a ni Lorrebie Rebis nga may 16 nga agencies nga nagatanyag man it trabaho sa guwa it nasyon.
Kaeabanan sa mga raya hay naga-usoy it manugturo, nurses, hotel workers, domestic workers, drivers ag maabong iba pa.
Ro may plano suno kana nga magpa-abroad hay raya eon ro andang kahigayunan bangud nga lehitimo ro mga ahensya nga magapasakop sa andang igapatigayon nga job fair nga maghalin pa sa Metro Manila, Cebu, Iloilo ag may branch man iya sa banwa it Kalibo.
Magdaea eamang sanda it maabong resume ag maging presentable sa pag-atubang sa mga interviewer.
