KALIBO, Aklan—Maayos nga natapos ro daywang adlaw nga mass testing sa tanan nga mga empleyado it Kalibo International Airport.
Suno kay Engr. Eusebio Monserate Jr., Manager it Civil Aviation Authority of the Philippines ukon CAAP-Aklan nga kapin sa 645 nga mga empleyado halin sa nagkaeain-eain nga attached agency it paeuparan ro ginpaidaeum sa swab test ko Huwebes ag Biyernes nga adlaw sa pagpanguna it Provincial Health Office ukon PHO-Aklan nga ginaeakipan it limang team.
Gin-eakip kara ro mga security personnel, airline employees ag nagamanehar it andang radar sa Tangalan.
Gin-schedule suno kana ro tanan nga mga empleyado sa pagbo-oe it andang swab specimen sample.
Sa mayad nga swerte suno kana nga ko Huwebes nga adlaw hay owa sanda it naka-schedule nga flight ag antes nga nag-landing ro eroplano ko biyernes hay haeos patapos eon ro mass testing rason nga owa raya naka-apekto sa operasyon it paeuparan.
Ginaeauman nga maipaguwa ro resulta it swab test, Sabado it hapon ukon Domingo nga adlaw.
Engkaso nga may mga empleyado nga magpositibo sa covid 19, igatugyan sanda sa andang natungdan nga municipal health office para sa mandatory nga 14 day quarantine.
Angot kara, padayon nga nagapadumdum si Engr. Monserate sa mga pasahero nga sundon ro ginapatuman nga minimum health standard sa bisinidad it paeuparan.
