KALIBO, Aklan—Gin-kordon ro daywang baeay sa F. Enriquez Road sa Brgy. Estancia, Kalibo matapos nga mailista idtu ro tatlong bag-ong kaso it Coronavirus Disease 2019 ukon covid -19.
Suno kay Punong Barangay Daisy Andrade it Estancia, Kalibo nga ginbawaean anay nga makaguwa ro mga residente sa gin-kordon nga baeay agud nga malikawan ro pagkalhit it nasambit nga deadly virus.
Mismong mga kaeapitbaeay ro nagabantay sa lugar ag ro mga taga-barangay ro naga-asikaso sa andang mga kinahangeanon partikular ro mga ginabakae nga pagkaon.
Magabuhay ro pag-kordon sa nasambit nga mga baeay hasta nga magguwa ro resulta it ginpatigayon nga swab tests.
Madumduman nga ko Enero 2, nagpaguwa ro Provincial Epidemiology Surveillance Unit (PESU) it bag-ong covid cases sa Aklan, kun sa siin ro 11 nga mga bag-ong kaso hay naghalin sa Brgy. Andagao ag Estancia sa Kalibo ag sambilog ro taga-banwa it Lezo.
Ro mga nag positibo hay gindaea eon sa isolation facility.
Ginpahayag dugang nga sambilog sa nagpositibo sa Brgy. Estancia hay sangka pari nga naka-assign sa isla it Boracay.
Ro banwa it Kalibo hay may kabilugan makaron nga 240 nga kaso, 202 ro naka-recover ag 4 ro naka-admit sa Aklan Provincial Hospital.
