Kalibo Aklan ————Daywang bueang eun lang antes ro filing it Certificate of Candidacy (COC), naging mainit ro mga alegasyon it ginabalita nga magapailihir bilang Congressman it 2nd District it probinsiya it Aklan sa paeaabuton nga 2022 national election kontra kay presenteng Aklan 2nd District Congressman Teodorico “Nonong” Haresco.
Suno kay Ret. Lt. Matt Wacan nga nagserbi it 27 anyos bilang suldado, dating administrator it Land Transportation Office (LTO) nga nahamtang sa Barangay Tigayon, Kalibo ag makarun hay proponent it LTO-Caticlan, nga owa pa imaw it pinal nga desisyon angot sa pagpadaeagan bilang kongresista it segondo distrito it probinsiya.
Apang may mga pomoeuyo sigon nga nagapadueong sa anang opisina nga nagasugid it andang kaeain it boot sa pagdumaea ni Congressman Haresco.
Ginkuwestiyon man kara ro sa sigon hay pagpamakae it mga bontante ni Haresco ko mga nagtaliwan nga eleksiyon ag pagbooe it 15 porsiyento sa tanan nga mga proyekto sa Western District it probinsiya.
Dugang pa kara nga dapat man sigon hay may tatak nga “IBAJAY” ro mga negosyo nga nagasueod sa Isla it Boracay ag indi pagpasugtan ro taga ibang banwa.
Samtang nagpanudpod man sigon it armas si Haresco sa anang mga kaalyado sa eleksiyon ko dag-on 2013 ag 2016.
Dugang pa kara nga ginbawasan man ni Haresco it P2500 pesos ro P5,000 pesos nga ayuda nga ginpanudpod it Department of Social Welfare and Development (DSWD).
