Nag-viral ag naging makaboeo-boe ro Facebook post it sangka ina sa Texas, U.S.A kun sa siin gin istorya nana nga nag order it 31 cheeseburgers ro anang 2-year old nga unga gamit ro anang smartphone.
Suno kay Kelsey Burkhalter Golden, makadali eamang nana nga gin-aywan ro anang smartphone kat ginpakialaman raya it anang unga nga si Barrett.
Gamit ro American food delivery app nga DoorDash, aksidenteng nag order si Barrett it 31 bilog it cheeseburgers sa sangka sikat nga fastfood restaurant.
Bangud nga nabayaran eon it credit card ni Kelsey ro mga cheeseburger owa eon imaw it nahimo kundi batunon ro food delivery.
Suno sa mga comment sa Facebook post ni Kelsey, ordinary eon ro makarondaya nga senaryo ag suwerte pang makabig rop natabu kanda.
May unang kaso kun sa siin nag order ro sangka unga it 71 bilog it tickets sa sangka NBA game.
May una man nga hitabu nga nag order it tatlong maeahaeon nga smartphone ro sangka 1-year old nga unga matapos pakialaman ro cell phone it anang ama.
Bangud nga bukon man it mahae ro nagastos sa cheeseburgers, naisipan ni Kelsey nga ipanupod ro sobra sa anang mga kaeapitbaeay.
