KALIBO, Aklan–Nagapangatubang makaron sa kasong Acts of Lasciviousness ro daywang ka eaeaki matapos nga gina-alegar nga ginbastos ro sangka 20-anyos nga babaye sa sangka barangay sa banwa it Balete.
Suno kay P/Major Bryan Alamo, hepe it Balete Municipal Police Station nga ro mga suspek nga parehong sa tamang pang edaron hay naaksidente sa ginasakyan nga motorsiklo ag nagpabulig sa biktima nga maeapatan it first aid ro andang naangkon nga lastro sa ueo ag iba pang parte it eawas.
Ginasugid nga naga isaeahanon eamang ro babaye sa andang baeay kat matabu ro insidente.
Bangud nga kakilaea man, owa nagduha-duha ro biktima nga buligan ro mga suspek.
Apang samtang nga ginabueong hay gina alegar nga ginbuytan it sambilog nga suspek ro anang alima ag pribadong parte it eawas.
Kadungan kara, malisyoso nga ginhulikap it sambilog pa ro anang abaga ag likod kamana man nga nagbuhi ro mga raya it mga bastos nga tinaga.
Nakasukoe ag maswerteng nakadaeagan ro biktima ag nakapangayo it bulig.
Ginasugid nga antes nga natabu ro insidente hay nakipag inuman pa ro mga suspek sa live-in partner it biktima.
Presenteng nakakulong ro daywa sa lock up cell it Balete PNP Station ag posibleng makahilway sa oras nga makapiyansa sa lunes kon pormal eon nga mapasaka ro kaso kontra kanda.
