KALIBO, Aklan— Nauli sa Amicable Settlement ro pag-atubang it daywang grupo it mga pamatan-on nga naeakot sa rambol sa Jawili Beach sa banwa it Tangalan ko Easter Sunday.
Raya ro ginkumpirma ni P/Capt. Aubrey Ayon, Hepe it Tangalan Municipal Police Station ag Public Information Officer it Aklan Police Provincial Office ukon APPO.
Madumduman nga ro video it natabu nga insidente hay nag-viral sa social media.
Suno kay Capt. Ayon nga base sa imbestigasyon, ro ginhalinan it gulo hay bangud sa nag-eupok nga balloon dugang pa nga puro sa impluwensiya it aeak ro imbolbado.
Pinaagi sa pagpatunga ni Punong Barangay James Tumbagahan it Jawili nga kaibahan sa nagresponde, nagkaayos ro magtimbang nga parte agud nga indi eon magkaeasuhan.
Ro an-um nga mga pamatan-on nga nagkasakitan kaibahan ro andang mga barkada hay parehong gindaea sa estasyon it Pulisya.
Makabig sigon raya nga isolated case ag owa man it narekober nga mga hinganiban.
Gindugang pa nga ro insidente hay insigidang narespondehan it mga kapulisan nga nakadeploy sa lugar sa gintukod nga Police Assistance Center kaibahan ro mga tanod.
Samtang, ko Easter Sunday, Abril 9, 2023 ro may nailistang pinakamaabu nga beachgoers sa kasaysayan it Jawili, Tangalan.
