KALIBO, Aklan—Nakuhit it daywang ka Aklanon Taekwondo athletes ro bueawan nga medalya sa ginpatigayon nga 29th California Open International Taekwondo Championships nga ginpatigayon sa El Camino College- North Gym sa Torrance, California, USA ko nagtaliwan nga Oktobre 14 hasta it 15, 2023.
Ginkilaea ni Melvin Arboleda, Taekwondo coach ro daywang manughampang nga sanday Mayden Niverca, 19-anyos, residente it Brgy. Briones, Kalibo nga naghampang sa kategoryang Senior Female Blackbelt sa Light Weight division over 49 to 52 kilogram kon sa siin naangkon kara ro bueawan nga medalya sa Kyurogi Event ukon Sparring ag si Fyll Krystyl Xylyl Oliva, 16-anyos it Roxas Avenue, Kalibo nga naghampang sa kategoryang Junior Female Blackbelt sa Fin Weight division over 42 kilogram kon sa siin nakuhilt man kara ro bueawan nga medalya sa kaparehong event.
Ginpahayag dugang ni Arboleda nga aktibo sa nasambit nga sports ro daywa kon sa siin una sandang nagpamayagpag sa Western Visayas Regional Athletic Association ukon WVRAA meet hasta nga nagpasakop sa nasambit nga sporting events sa nagkaeain-eain nga nasyon.
Sa kamatuoran suno kana ko 2019 World Peace Taekwondo Festival nga ginpatigayon sa Shinhan University sa Seoul, South Korea hay nakakuhit si Oliva it tatlong bueawan nga medalya samtang tig-sangka gold ag silver medals mat-a ro naangkon ni Niverca.
Mag-eowas kara, sa kaparehong dag-on hay nag-uli man it kadungganan ro daywa maghalin sa 9th Tirak Taekwondo International Championships nga ginpatigayon sa Bangkok, Thailand kon sa siin si Oliva hay nakakuhit it bueawan nga medalya samtang silver medal mat-a ro napasaalima ni Niverca.
May kaangtanan kara, eubus man ro pagpasaeamat ni Arboleda sa lokal nga gobyerno it Kalibo ag sa gobyerno probinsyal sa suporta nga ginpaabot kanda bangud nga ro kadaeag-an it daywa hay dugang sa andang nailistang record bilang atleta it probinsya it Aklan ag bilog nga nasyon it Pilipinas sa nasambit nga sporting event.
