Kapin sa limang ka pasahero ro nakaangkon it minor injuries kasunod it aksidente nga nag-eontad sa diversion road nga sakop it Brgy. Tondog, Tangalan nga ginkaimbolbaran it daywang ka bus.
Suno kay PMSgt. Peryll Antaran it Tangalan Municipal Police Station nga nagasunod ro daywang ka saeakyan nga Alphs, sakay ro 42 nga pasahero, conductor ag ginamaneho ni Michael Ian Lomugdang, 35-anyos it Madranca, San Jose, Antique kamana man ro Alabang transport nga may 49 nga pasahero, conductor ag ginamaneho ni Bonifacio Guarana, 58-anyos it Sapote, Las Piñas City paadto sa direksyon it Caticlan, Malay.
Sa inisyal nga imbestigasyon it pulisya, uwa sigon nakasayod ro driver nga si Guarana nga may diversion road sa nasambit nga lugar kon sa siin nagslow down si Lomugdang ag magaliko sa nasambit nga karsada.
Bangud sa medyo may kadasigon ro daeagan it Alabang transport ag naaeang-aeangan imaw sa lugar hay nasagi nana ro Alphs rason nga dumiretso raya sa eanas nga gintunaan it andang pagkaaksidente.
Minor injuries eamang ro naangkon it mga pasahero it nasambit nga bus ag uwa man it may nailista nga gindaea sa ospital.
Ginpahayag dugang ni PMSgt. Antaran nga nagkasugot ro daywang ka kompanya nga ro Alabang transport ro maga-cater sa damage nga gintuga sa Alphs ag ro mga pasahero hay gintransfer sa andang ibang unit agud nga inde maulihi sa byahe.
