KALIBO, Aklan—Ginkasubo it Banga Muncipal Inter-Agency Task Force (MIATF) ro pagkamatay it daywa nandang kasimanwa bangud sa Coronavirus Disease 2019 ukon COVID-19.
Suno kay Donnalyn Siyambio, tagapaghambae it Banga MIATF, ro mga nasambit nga pasyente hay ginaeakipan it sangka 66-anyos nga eaeaking residente it Brgy. Mangan ag 84-anyos nga babayeng taga Brgy. Palale sa nasambit nga banwa.
Ginasugid nga antes pa man nagpositibo sa deadly virus hay under treatment eon sa sakit nga Leukemia ro 66-anyos nga pasyente.
Ko adlaw it Biyernes hay gindeklara sigon raya nga recovered halin sa COVID-19 apang namatay.
Samtang, ro 84-anyos nga pasyente mat-a hay gindaea sa ospital matapos makaangkon it eagnat ag ubo kun siin idto man raya binawian it kabuhi.
Ro tanan suno kana nga high risk contact it nasambit nga mga pasyente hay ginpaidaeom eon sa swab test.
Sa makaron, ro Banga hay nakalista eon it kabilugang 226 nga kumpirmadong kaso it deadly virus.
Kun sa siin, 155 eon ro mga nagmayad ag 54 pa ro active cases samtang 7 ro namatay.
