KALIBO, Aklan—Magapangatubang sa kasong pag-eabag sa Republic Act 9165 ukon Comprehensive Dangerous Drugs Act of 2022 ro daywang ka mga indibidwal matapos nga madakpan sa ginpatigayon nga drug buy-bust operation sa pagpanguna it Provincial Drug Enforcement Agency ukon PDEA kabulig ro Provincial Drug Enforcement Unit ukon PDEU ag Kalibo PNP sa Concepcion St. Corner Goding Ramos St. Poblacion, Kalibo.
Ginkilaea ro mga suspek nga sanday Rommel Garcia, 46-anyos it Brgy.Tinigaw ag Jhon Ryan Malbas, 42-anyos it Brgy. Mabilo sa nasambit nga banwa.
Narekober sa posisyon ag kontrol it daywa ro kapin sa pitong ka sachet it suspected shabu.
Suno kay agent Gregorio it PDEA Aklan nga si Garcia ro andang nabak-ean it illegal nga droga ag kaibahan nana si Malbas sa oras it operasyon kon sa siin sa impormasyon nga nabaton it mga awtoridad hay daywa mismo sanda ro nagaduso kara.
Kapin sa tatlong buean eon sanda nga ginamonitor kon sa siin bilog nga probinsya it Aklan ro andang sakop sa andang illegal nga aktibidad.
Ro daywa hay dati eon man nga nakulong bangud man sa pagduso it illegal nga droga apang temporaryong nakahilway matapos nga naka-avail it plea bargaining.
