KALIBO, Aklan—Nagahimas eon it maeamig nga rehas sa locked up cell it Kalibo Police Station ro daywang ka eaeaki matapos nga maaresto sa kasong carnapping sa C. Laserna St. Poblacion, Kalibo.
Ginkilaea ro mga akusado nga sanday Val Dela Rosa ag Archy Dela Cruz, sa legal nga edad ag parehong residente it nasambitang lugar.
Ro nasambit nga mga akusado hay madinaeag-on nga nadakpan sa ginpatigayon nga operation it gintingob nga pwersa it Kalibo PNP, Criminal Investigation Detection Group (CIDG) ag Highway Patrol Group (HPG) Aklan pinaagi sa gahum it warrant of arrest sa kasong pag-eabag sa Republic Act 10883 ukon Anti- Carnapping Act of 2016 nga may Criminal Case No. 15552 nga ginpaguwa ag ginpirmahan ni Hon. Bienvinido P. Barrios Jr., Regional Trial Court, Kalibo, Aklan, 6th Judicial Region nga may petsang Oktobre 19, 2020.
Kapin sa P300,000 pesos ro gintaeanang pyansa it korte para sa temporaryong kahilwayan it nasambitang mga akusado.
