KALIBO, Aklan—Padayun nga ginabueong sa Aklan Provincial Hospital ro daywang ka eaeaki nga nabun-an matapos nga maeakot sa komosyon sa sangka birthday party bandang alas-8:00 kabi-i sa Brgy. Venturanza, Banga.
Ginkilaea ni PSSgt. Elmar Relente, imbestigador sa kaso it Banga PNP ro mga biktima nga sanday Marte Dalida, 41-anyos nga nag-angkon it igo it pagbuno sa tiyan ag Arjay Insauriga, 48-anyos nga may tama man sa tiyan, parehong mga residente it nasambit nga lugar.
Samtang ro mga ginaturo nga suspek hay sanday Niño Insauriga, 29-anyos it Brgy. Polocate, Banga ag Jofel Mainit, 33-anyos it Brgy. Agcawilan, Lezo.
Suno kay Relente nga samtang sa katung-anan it kasadyahan hay nakaangkon it mainitang diskusyon sa tunga ni Niño Insauriga ag unga ni Marte nga si John Martin Dalida, 19-anyos, tumandok man it nasambit nga lugar.
Ginasugid nga matapos nga makita it ama nga ginbayo ni Niño ro anang unga nga si John Martin hay naghana raya nga magpatunga.
Apang gulpi raya nga ginbuno ni Insauriga.
Pagkatapos kara hay nakaangkon it rambol, kun sa siin, hay nadaeahig man ro iba pang bisita sa okasyon nga si Arjay Insauriga nga nabun-an ni Mainit sa anang tiyan.
Sangka Ruel Insauriga ro natigayon pa nga mabun-an ni Mainit.
Ro mga suspek hay presenteng nakakulong sa lock up cell it Banga PNP. Nagapadayun pa ro imbestigasyon it pulisya sa nasambit nga insidente.
