Kalibo Aklan ———-Nakataeana nga magapangatubang sa kasong pag-eabag sa Presidential Decree 1602 ukon Anti Illegal Gambling Act ro daywang ka mga indibidwal matapos nga maaktuhan nga nagasugae it “tong its” sa Brgy. Bugasongan, Lezo.
Ginkilaea ro daywa kanday Darrie Mirasol ag Gene Sotomel, parehong 59-anyos ag residente man it nasambit nga lugar.
Sandig sa imbestigasyon it Lezo PNP, may nakatimbre sigon nga concern citizen sa andang taeatapan nga may nagasugae sa nasambit nga lugar.
Angot kara, insigidang nagkasa it operasyon ro pulisya ag dikara nadakpan ro daywa samtang nakapaeagyo ro sambilog nandang kaibahan.
Narekober sa andang posisyon ag kontrol ro sangka set it baraha ag kapin sa P63 pesos nga kwarta nga ginamit bilang taya sa nasambit nga sugae.
Ro daywa hay una eon sa kustudiya it Lezo PNP para sa nagakaigong disposisyon.
