KALIBO, Aklan–Haeos indi makapati ro daywang ka mga Aklanon nga newly registered Archetict nga naeakip ro andang pangaean sa listahan it mga nakapasar sa kakatapos eamang nga licensure examination.
Suno kay Architect Jayza Adoc nga owa pa masyadong naga-sink in sa anang kaugalingon ro resulta it exam.
Pilang adlaw sigon antes nagguwa ro resulta hay temporaryo anay imaw nga nag-isolate ukon nagpaeayo sa anang pamilya tuga it pressure nga nabatyagan.
Owa sigon nana ginaeauman nga makaibahan imaw sa 57 porsyento nga nakapasa.
Aminado raya nga sambilog ro architecture sa makabig nga mabudlay nga kurso kung siin kinahang-ean nga maging haum physically, emotionally ag financially.
Dapat man sigon nga makaangkon it disiplina sa kaugalingon eabi eon kung nagahilapit eon ro tyempo it eksaminasyon.
Sa pihak nga parte, eubos man ro kalipay ag pagpasaeamat it retaker nga si Architech Ken Naben Bermudez matapos ro anang uman nga pag-risgo sa pagbuoe it exam.
Gin-aku man kara nga nakabatyag imaw it pressure bangud owa eon imaw naila nga makatao pa it uman nga disappointment sa anang pamilya ag iba pang tawong nakapalibot nga nagaeaum sa anang kapasidad.
Gin-istorya man kara nga bata pa eamang imaw hay nakahiligan eon nana ro pag-drawing ag pagdesinyo.
Gusto sigon nana nga mas pang ma-ehance ro anang abilidad rason nga nagbuoe imaw kursong Architecture.
Ginlaygayan man kara ro mga aspiring achitect nga indi pagkalipatan nga magpangayo it guidance sa Ginoo kung nagabuoe it board exam kamana man nga dapat masayuran ro mga technique nga makabulig agud maintindihan ro tanan nga gina-review.
