KALIBO, Aklan—Eubus ro kalipay it daywang ka mga Aklanon nga napabahin ro andang pangaean sa mga nakapasa sa eksaminasyon kon sa siin makabig eon sanda makaron bilang registered psychometricians.
Si Vanessa Ann Enecito, residente it Brgy. Guadalupe, Libacao hay graduate it Bachelor of Science in Psychology sa Central Philippine University sa syudad it Iloilo bilang Magna Cum Laude.
Suno kana, nagapabilin nga shock imaw matapos nga napagtagumpayan ro examinations maskin nga nagself review eamang imaw.
Raya hay matapos nga uwa imaw nakahingabot sa enrollment it review center.
Apang, ginpadayon gihapon kara ro pagbueo it exam sa bulig man it anang mga ginikanan ag pamilya.
Sa pihak it tuman nga kakoeba hay uwa gid imaw nadueaan it pagsalig sa Diyos hasta nga naipasa nana ro nasambit nga eksaminasyon.
Samtang sa pihak nga parte, naging inspirasyon ni Jay-F O. David it Barangay Estancia, Kalibo ro anang bilog nga pamilya sa pagbuoe nana it eksaminasyon.
Suno kana, bukon it madali ro anang inagyan para makuhit ro titueo nga registered psychometrician apang bangud sa presensya it anang pamilya hay ana raya nga nasuk-ean ag napagtagumpayan.
Si David hay consistent honor student sa anang elementarya hasta it sekondarya ag nagtapos bilang Cum Laude sa Central Philippine University sa syudad it Iloilo sa kursong Bachelor of Science in Psychology.
Ginpanugyan it daywa nga inde madueaan it pag-eaum kon ro handom gid hay magbueo it kaparehas nanda nga kurso.
Uwa it malisod kon ginahuguran ag ginapursigihan ro tanan.
