KALIBO, Aklan—Natigayun nga mabuoe it sangka owa pa makilaeang persona ro cellphone it daywang ka mga babaye nga nagatrabaho sa sangka RTW shop sa bahin it Roxas Avenue, Kalibo.
Ginpahayag it sambilog sa mga biktima nga si Jackelyn Rose, 19-anyos, residente it Purok 5, C. Laserna Street, Kalibo nga nagsueod sa andang shop ro suspek ag ginsumbilan sanda it cellphone sa barato nga kantidad.
Aminado ro biktima nga na-engganyo sanda it anang sambilog pang kaibahan nga magbakae it cellphone.
Apang, nagpahayag sigon ro suspek nga kinahang-ean anay nanda nga daehon ro andang cellphone sa sangka shop sa sueod it mabahoe nga mall nga nahamtang sa Roxas Avenue Extension bangud sambilog raya sa requirements antes nga i-release ro unit.
Kaibahan sigon nanda nga nagsakay it tricycle ro suspek apang pag-abot sa area it Kalibo Public Market hay gulpi eamang kara nga ginbuoe ro andang cellphone ag madasig nga nagdaeagan pasueod it tindahan.
Gintinguhaan pa sigon nanda raya nga eagson apang owa eon nanda maabutan pa.
Matapos ro hitabo, ginpakamayad it mga biktima nga ireport ro insidente sa Kalibo Municipal Police Station.
Samtang, base sa buoe it CCTV footage it establisymento kun siin nagatrabaho ro mga biktima, makita ro itsura it suspek bangud nakapanaog ro suksok kara nga face mask.
Ro suspek hay nakasuksok it kulay puea nga eambong ag short kamana man nga mabukod ro pang-eawason ag tagaeog ro ginagamit nga lenggwahe.
